ກອງປະຊຸມລະດັບຊາດກ່ຽວກັບລະບົບສະບຽງອາຫານ 2021 - ຮ່ວມມືກັນເພື່ອສ້າງລະບົບສະບຽງອາຫານທີ່ຍືນຍົງ

ເພື່ອເປັນສ່ວນໜຶ່ງຂອງ ແຜນງານ 10 ປີໃນການບັນລຸ ປພຍ ພາຍໃນປີ 2030, ກອງປະຊຸມສຸດຍອດລະບົບສະບຽງອາຫານ 2021 ແມ່ນແນໃສ່ສ້າງລະບົບສະບຽງອາຫານໃນອະນາຄົດໃນທົ່ວໂລກໃຫ້ມີຄວາມຍືນຍົງ ແລະ ທັງຍັງຈຸດປະກາຍວິທີທາງໃນການໄປເຖິງເປົ້າໝາຍດັ່ງກ່າວນຳອີກ. ທ່ານ Nasar Hayat, ຜູ້ຕາງໜ້າອົງການ FAO, ໄດ້ແບ່ງປັນວ່າ ລະບົບສະບຽງອາຫານ ແມ່ນການສ້າງຄວາມກ້າວໜ້າທີ່ສອດຄ່ອງ ແລະ ກວມລວມກັບການບັນລຸວິໄສທັດຂອງ ວາລະການພັດທະນາແບບຍືນຍົງ 2030. ມັນແມ່ນວຽກງານທີ່ກວມເອົາຫຼາຍຂະແໜງການ ແລະ ຄູ່ຮ່ວມງານທຸກຝ່າຍໃນລະບົບ - ນັບຕັ້ງແຕ່ການປູກຝັງໄປຈົນເຖິງການວາງແຜນ. “ພວກເຮົາຕ້ອງໄດ້ເຮັດວຽກຮ່ວມກັນ ເພື່ອສ້າງຄວາມເຂັ້ມແຂງໃຫ້ແກ່ ລະບົບສະບຽງອາຫານ ໃນທຸກລະດັບ ເພື່ອບັນລຸເປົ້າໝາຍການພັດທະນາແບບຍືນຍົງ”, ທ່ານ Nasar ກ່າວ.

ເພື່ອເປັນສ່ວນໜຶ່ງຂອງ ແຜນງານ 10 ປີໃນການບັນລຸ ປພຍ ພາຍໃນປີ 2030, ກອງປະຊຸມສຸດຍອດລະບົບສະບຽງອາຫານ 2021 ແມ່ນແນໃສ່ສ້າງລະບົບສະບຽງອາຫານໃນອະນາຄົດໃນທົ່ວໂລກໃຫ້ມີຄວາມຍືນຍົງ ແລະ ທັງຍັງຈຸດປະກາຍວິທີທາງໃນການໄປເຖິງເປົ້າໝາຍດັ່ງກ່າວນຳອີກ. ທ່ານ Nasar Hayat, ຜູ້ຕາງໜ້າອົງການ FAO, ໄດ້ແບ່ງປັນວ່າ ລະບົບສະບຽງອາຫານ ແມ່ນການສ້າງຄວາມກ້າວໜ້າທີ່ສອດຄ່ອງ ແລະ ກວມລວມກັບການບັນລຸວິໄສທັດຂອງ ວາລະການພັດທະນາແບບຍືນຍົງ 2030. ມັນແມ່ນວຽກງານທີ່ກວມເອົາຫຼາຍຂະແໜງການ ແລະ ຄູ່ຮ່ວມງານທຸກຝ່າຍໃນລະບົບ - ນັບຕັ້ງແຕ່ການປູກຝັງໄປຈົນເຖິງການວາງແຜນ. “ພວກເຮົາຕ້ອງໄດ້ເຮັດວຽກຮ່ວມກັນ ເພື່ອສ້າງຄວາມເຂັ້ມແຂງໃຫ້ແກ່ ລະບົບສະບຽງອາຫານ ໃນທຸກລະດັບ ເພື່ອບັນລຸເປົ້າໝາຍການພັດທະນາແບບຍືນຍົງ”, ທ່ານ Nasar ກ່າວ.

ໃນລະຫວ່າງກອງປະຊຸມລະດັບຊາດນີ້, ພະນະທ່ານ ປອ. ເພັດ ພົມພິພັກ, ລັດຖະມົນຕີກະຊວງກະສິກຳ ແລະ ປ່າໄມ້, ໄດ້ເນັ້ນໜັກວ່າ “ກອງປະຊຸມລະດັບຊາດກ່ຽວກັບລະບົບສະບຽງອາຫານ ໃນຄັ້ງນີ້ແມ່ນບາດກ້າວເລີ່ມຕົ້ນທີ່ສຳຄັນໃນການລວບລວມເອົາຂະແໜງການລັດໃນທຸກລະດັບ, ຄູ່ຮ່ວມພັດທະນາ, ອົງການຈັດຕັ້ງທາງສັງຄົມ, ອົງການຈັດຕັ້ງທີ່ບໍ່ສັງກັດລັດຖະບານ ແລະ ພາກເອກະຊົນ ເພື່ອມາຮ່ວມກັນປຶກສາຫາລືກ່ຽວກັບລະບົບສະບຽງອາຫານໃນ ສປປ ລາວ ແລະ ເພື່ອຕົກລົງເປັນເອກະພາບກັນດ້ານທິດທາງໃນການບັນລຸ ປພຍ 1 ແລະ ປພຍ 2.” ທ່ານລັດຖະມົນຕີຍັງໄດ້ເນັ້ນໜັກວ່າກອງປະຊຸມພາຍໃຕ້ຫົວຂໍ້ຫຼັກໃນຄັ້ງນີ້ຍັງສອດຄ່ອງກັບບຸລິມະສິດແຫ່ງຊາດຂອງ ສປປ ລາວ ທີ່ສະທ້ອນຜ່ານ ແຜນພັດທະນາເສດຖະກິດສັງຄົມແຫ່ງຊາດ (NSEDP) ແລະ ຍຸດທະສາດການພັດທະນາກະສິກຳ (ADS).

ໃນຊ່ວງຊຸມປີທີ່ຜ່ານມາ, ສປປ ລາວ ໄດ້ສ້າງຄວາມຄືບໜ້າຢ່າງໃຫຍ່ຫຼວງຕໍ່ກັບ ປພຍ ແລະ ການສ້າງລະບົບສະບຽງອາຫານໃຫ້ມີຄວາມຍືນຍົງຂຶ້ນຕື່ມ. ເຖິງແມ່ນວ່າ ສປປ ລາວ ຕ້ອງໄດ້ປະເຊີນກັບບັນຫາທ້າທາຍຫຼາຍປະການ ແລະ ຍັງມີຄວາມອ່ອນໄຫວຕໍ່ການປ່ຽນແປງດ້ານສະພາບອາກາດຢູ່ກໍ່ຕາມ, ລັດຖະບານກໍ່ໄດ້ຈັດຕັ້ງປະຕິບັດຫຼາຍນະໂຍບາຍ ແລະ ກອບວຽກ ທີ່ຊ່ວຍສ້າງສະພາບແວດລ້ອມທີ່ເອື້ອອຳນວຍຕໍ່ການສ້າງລະບົບສະບຽງອາຫານໃຫ້ມີຄວາມຍືນຍົງຂຶ້ນຕື່ມໃນ ສປປ ລາວ.

ທ່ານນາງ ຊາຣາ ເຊັກເກນເນສ, ຜູ້ປະສານງານອົງການ ສປຊ ປະຈຳ ສປປ ລາວ, ໄດ້ເນັ້ນຢ້ຳເຖິງຄວາມສຳຄັນຂອງກອງປະຊຸມລະດັບຊາດໃນຄັ້ງນີ້, ໂດຍເນັ້ນໜັກໃສ່ການຮ່ວມມືກັນໃນຂັ້ນຕອນນີ້ ແລະ ຄວາມເປັນໄປໄດ້ໃນການເລັ່ງລັດຄວາມຄືບໜ້າຂອງ ປພຍ ໃນ ລາວ, “4 ຫົວຂໍ້ຫຼັກຂອງການປຶກສາຫາລືໃນຄັ້ງນີ້ແມ່ນສ່ວນເສີມທີ່ດີຕໍ່ກອບວຽກ ‘5P’ ຂອງ ປພຍ ທີ່ກ່ຽວຂ້ອງກັບປະຊາຊົນ, ໂລກ, ຄວາມຈະເລີນຮູ່ງເຮືອງ, ສັນຕິພາບ ແລະ ການເປັນຄູ່ຮ່ວມມື. ທັງສອງກອບວຽກແມ່ນມີຄວາມກ່ຽວພັນກັນ, ແລະ ບໍ່ແມ່ນກຸ່ມເປົ້າໝາຍທີ່ແຍກຈາກກັນ, ທັງຍັງສົ່ງເສີມກັນເປັນຢ່າງດີ. ໃນດ້ານກອງປະຊຸມລະດັບຊາດນີ້, ເປົ້າໝາຍຂອງພວກເຮົາແມ່ນເພື່ອດັດປັບຈຸດປະສົງຂອງແຕ່ລະຫົວຂໍ້ໃຫ້ມີຄວາມດຸ່ນດ່ຽງກັນ ແລະ ຊອກຫາຊ່ອງທາງທີ່ດີທີ່ສຸດໃນການກ້າວໄປທາງໜ້າ ເພື່ອສ້າງລະບົບສະບຽງອາຫານໃນ ສປປ ລາວ ໃຫ້ມີຄວາມຍືຶນຍົງຂຶ້ນຕື່ມ. ຂັ້ນຕອນນີ້ແມ່ນສົ່ງເສີມຄວາມກວມລວມ, ການປຶກສາຫາລືກັນ ແລະ ການຮ່ວມມື ພ້ອມທັງຍັງສອດຄ່ອງກັບ ຂອບການຮ່ວມມືລະຫວ່າງ ສປປ ລາວ-ສປຊ ຄັ້ງໃໝ່, ໂດຍສະເພາະດ້ານວິທີການທີ່ເອົາປະຊາຊົນເປັນແກນກາງ ເພື່ອຮັບປະກັນໃຫ້ພວກເຮົາທຸກຄົນພ້ອມກັນກ້າວໄປໃນຊ່ວງໄລຍະທີ່ສຳຄັນຂອງການພັດທະນາປະເທດ.”

ໃນລະຫວ່າງກອງປະຊຸມ, ຜູ້ເຂົ້າຮ່ວມໄດ້ສົນທະນາ ແລະ ຕົກລົງເປັນເອກະພາບກັນກ່ຽວກັບທິດທາງກ້າວໄປທາງໜ້າ, ການສ້າງຄວາມເຂັ້ມແຂງດ້ານຄຳໝັ້ນສັນຍາທີ່ກ່ຽວຂ້ອງກັບທິດທາງແຫ່ງຊາດໃນການສ້າງລະບົບສະບຽງອາຫານໃນ ສປປ ລາວ ໃຫ້ມີຄວາມຍືນຍົງຂຶ້ນຕື່ມ. ບົດລາຍງານລວມດ້ານການດຳເນີນງານຈະຖືກນຳສະເໜີໂດຍຄະນະຈັດຕັ້ງກອງປະຊຸມລະດັບຊາດໃຫ້ແກ່ ຄະນະກະກຽມກອງປະຊຸມສຸດຍອດ ຢູ່ ໂຣມ ໃນເດືອນກໍລະກົດ ກ່ອນຈະສົ່ງຕໍ່ໃຫ້ ກອງປະຊຸມສຸດຍອດລະດັບໂລກ ພາຍໃຕ້ຂອບຂອງ ກອງປະຊຸມສະມັດຊາໃຫຍ່ ສປຊ ທີ່ຈະຖືກຈັດຂຶ້ນໃນເດືອນກັນຍາ 2021.