ສານຈາກ ເລຂາທິການໃຫຍ່ ສປຊ, ທ່ານ António Guterres ກ່ຽວກັບ ການເຜີຍແຜ່ບົດລາຍງານສະບັບທີ 3 ຂອງ IPCC

ຄະນະລູກຂຸນໄດ້ບັນລຸຄຳຕັດສິນແລ້ວ.

ແລະ ມັນແມ່ນສິ່ງທີ່ໜ້າເສົ້າໃຈຫຼາຍ.

ບົດລາຍງານສະບັບນີ້ຂອງ ຄະນະກຳມະການລະຫວ່າງລັດຖະບານວ່າດ້ວຍການປ່ຽນແປງດິນຟ້າອາກາດ ໄດ້ສະແດງໃຫ້ເຫັນເຖິງຄຳໝັ້ນສັນຍາດ້ານສະພາບອາກາດທີ່ລົ້ມເຫຼວ.

ມັນຍັງສະແດງໃຫ້ເຫັນເຖິງຄວາມອັບອາຍ, ເຕັມໄປດ້ວຍສັນຍາອັນຫວ່າງເປົ່າ ທີ່ຈະນຳພາພວກເຮົາໄປສູ່ໂລກທີ່ບໍ່ສາມາດຢູ່ອາໄສໄດ້.

ພວກເຮົາກຳລັງກ້າວກະໂດດສູ່ໄພພິບັດດ້ານສະພາບອາກາດ:

ບັນດາເມືອງໃຫຍ່ຕ້ອງຈົມຢູ່ໃຕ້ນ້ຳ.

ຄື້ນຄວາມຮ້ອນທີ່ບໍ່ເຄີຍມີມາກ່ອນ.

ລົມພາຍຸທີ່ຮຸນແຮງ.

ພາວະຂາດແຄນນ້ຳທີ່ແຜ່ກວ້າງອອກ.

ພືດ ແລະ ສັດຫຼາຍລ້ານຊະນິດຕ້ອງສູນພັນໄປ.

ນີ້ບໍ່ແມ່ນນິຍາຍ ຫຼື ການກ່າວເກີນຈິງ.

ມັນແມ່ນສິ່ງທີ່ວິທະຍາສາດບອກເຮົາ ເຊິ່ງເປັນຜົນມາຈາກນະໂຍບາຍດ້ານພະລັງງານໃນປັດຈຸບັນຂອງພວກເຮົາ.

ພວກເຮົາກຳລັງເຮັດໃຫ້ສະພາວະໂລກຮ້ອນຮ້າຍແຮງຕື່ມ ດ້ວຍອຸນຫະພູມທີ່ຈະເພີ່ມສູງຂຶ້ນຫຼາຍກວ່າ 2 ເທົ່າຂອງກຳນົດ 1.5 ອົງສາ ທີ່ເຫັນດີຮ່ວມກັນຢູ່ ປາຣີ.

ຜູ້ນຳພາກລັດ ແລະ ພາກທຸລະກິດບາງສ່ວນແມ່ນເວົ້າຢ່າງ, ແຕ່ເຮັດອີກຢ່າງ.

ເວົ້າງ່າຍໆກໍ່ຄື, ພວກເຂົາກຳລັງເວົ້າຕົວະ.

ແລະ ຜົນທີ່ຕາມມາກໍ່ຮ້າຍແຮງທີ່ສຸດ.

ນີ້ແມ່ນສະຖານະການສຸກເສີນດ້ານສະພາບອາກາດ.

ນັກວິທະຍາສາດດ້ານສະພາບອາກາດອອກມາເຕືອນວ່າພວກໄດ້ຍັບເຂົ້າໃກ້ຈຸດສູງສຸດ ທີ່ຈະພາໃຫ້ເກີດຜົນກະທົບດ້ານດິນຟ້າອາກາດທີ່ຮ້າຍແຮງ ແລະ ບໍ່ສາມາດແກ້ໄຂໄດ້.  

ແຕ່ລັດຖະບານ ແລະ ບັນດາບໍລິສັດທີ່ສ້າງອາຍພິດສູງ ກໍ່ຍັງລະເລີຍບັນຫາດັ່ງກ່າວ; ແຖມຍັງລາດນ້ຳໃສ່ໄຟຕື່ມອີກ.

ພວກເຂົາກຳລັງບີບຮັດໂລກຂອງພວກເຮົາ, ພຽງເພື່ອແຕ່ຜົນປະໂຫຍດ ແລະ ການລົງທຶນອັນເປັນປະຫວັດການຂອງຕົນເຂົ້າໃນເຊື້ອໄຟຟອດຊິວ, ໂດຍລະເລີຍພະລັງງານທົດແທນທີ່ມີຕົ້ນທຶນຖືກກວ່າ ທີ່ຊ່ວຍສ້າງວຽກເຮັດງານທຳສີຂຽວ, ຮັບປະກັນຄວາມໝັ້ນຄົງດ້ານພະລັງງານ ແລະ ສະຖຽນລະພາບດ້ານລາຄາ.

ພວກເຮົາສຳເລັດກອງປະຊຸມ COP26 ຢູ່ Glasgow ດ້ວຍຄວາມຫວັງ ແລະ ຄຳໝັ້ນສັນຍາອັນໃໝ່ທີ່ຂາດຄວາມລະອຽດ ແລະ ຮອບຄອບ.

ແຕ່ບັນຫາຫຼັກ - ບັນຫາການປ່ອຍອາຍພິດເຮືອນແກ້ວທີ່ຂະຫຍາຍວົງກວ້າງ ແລະ ເພີ່ມຂຶ້ນ - ພັດຖືກລະເລີຍ.

ວິທະຍາສາດໄດ້ສະແດງໃຫ້ເຫັນແຈ້ງແລ້ວ.

ຈະສາມາດຮັກສາການເພີ່ມຂຶ້ນຂອງອຸນຫະພູມພາຍໃນລະດັບ 1.5 ອົງສາດັ່ງທີ່ເຫັນດີກັນຢູ່ ປາຣີ ໄດ້ນັ້ນ, ພວກເຮົາຕ້ອງຫຼຸດການປ່ອຍອາຍພິດເຮືອນແກ້ວໃນທົ່ວໂລກລົງໃຫ້ໄດ້ 45 ສ່ວນຮ້ອຍ ພາຍໃນທົດສະວັດນີ້.

ແຕ່ຄຳໝັ້ນສັນຍາດ້ານດິນຟ້າອາກາດໃນປັດຈຸບັນ ພັດຈະເຮັດໃຫ້ການປ່ອຍອາຍພິດເພີ່ມຂຶ້ນ 14 ສ່ວນຮ້ອຍ.

ແລະ ຜູ້ທີ່ປ່ອຍອາຍພິດກໍ່ບໍ່ໄດ້ດຳເນີນບາດກ້າວທີ່ຈຳເປັນຫຍັງເລີຍ ໃນການບັນລຸຄຳໝັ້ນສັນຍາທີ່ບໍ່ເຂັ້ມແຂງເຫຼົ່ານັ້ນ.

ບາງຄັ້ງນັກເຄື່ອນໄຫວດ້ານດິນຟ້າອາກາດກໍ່ຖືກຫາວ່າເປັນກຸ່ມຫົວຮຸນແຮງ.

ແຕ່ຜູ້ທີ່ເປັນກຸ່ມຫົວຮຸນແຮງອັນຕະລາຍທີ່ແທ້ຈິງ ແມ່ນບັນດາປະເທດທີ່ກຳລັງເພີ່ມການຜະລິດເຊື້ອໄຟຟອດຊິວຕ່າງຫາກ.

ການລົງທຶນເຂົ້າໃນໂຄງລ່າງພື້ນຖານດ້ານເຊື້ອໄຟຟອດຊິວໃໝ່ ແມ່ນການກະທຳທີ່ຂັດຕໍ່ຫຼັກສິນທຳ ແລະ ເສດຖະກິດ.

ການລົງທຶນດັ່ງກ່າວ, ທ້າຍສຸດແລ້ວ, ກໍ່ຈະກາຍເປັນຊັບສິນທີ່ໄຮ້ຄ່າ - ເປັນຮອຍດ່າງເທິງພື້ນດິນ, ແລະ ເປັນຮອຍແປດເປື້ອນເທິງປະຫວັດການລົງທຶນ.

ແຕ່ມັນຕ້ອງບໍ່ເປັນແບບນີ້. 

ບົດລາຍງານໃນມື້ນີ້ແມ່ນເນັ້ນໜັກໃສ່ການຫຼຸດຜ່ອນ - ການຈຳກັດການປ່ອຍອາຍພິດ.

ມັນໄດ້ກຳນົດທາງເລືອກທາງການເງິນທີ່ເປັນໄປໄດ້ໃຫ້ແກ່ທຸກຂະແໜງການ ທີ່ສາມາດຮັກສາການເພີ່ມຂຶ້ນຂອງອຸນຫະພູມພາຍໃນລະດັບ 1.5 ອົງສາໄດ້.

ກ່ອນອື່ນໝົດ, ພວກເຮົາຕ້ອງເລັ່ງລັດການຫັນໄປສູ່ພະລັງງານທົດແທນໃຫ້ໄດ້ໄວທີ່ສຸດ.

ນັ້ນໝາຍເຖິງການຍົກຍ້າຍການລົງທຶນ ແລະ ການສະໜັບສະໜຸນຈາກເຊື້ອໄຟຟອດຊິວ ໄປສູ່ພະລັງງານທົດແທນ, ຕັ້ງແຕ່ດຽວນີ້.

ໃນຫຼາຍໆກໍລະນີ, ພະລັງງານທົດແທນແມ່ນມີລາຄາທີ່ຖືກກວ່າຫຼາຍແລ້ວ.

ມັນຍັງໝາຍເຖິງການທີ່ລັດຖະບານຈະຢຸດເຊົາການລົງທຶນໃສ່ຖ່ານຫິນ, ບໍ່ພຽງແຕ່ຢູ່ຕ່າງປະເທດ, ແຕ່ລວມເຖິງໃນປະເທດນຳ.

ມັນຍັງໝາຍເຖິງການຮ່ວມມືກັນລະຫວ່າງບັນດາປະເທດທີ່ພັດທະນາແລ້ວ, ທະນາຄານພັດທະນາຮ່ວມຫຼາຍຝ່າຍ, ສະຖາບັນການເງິນເອກະຊົນ, ແລະ ບໍລິສັດທີ່ມີເຕັກໂນໂລຊີທີ່ພຽງພໍ, ເພື່ອສະໜັບສະໜຸນບັນດາເສດຖະກິດເກີດໃໝ່ໃຫ້ສາມາດຫັນປ່ຽນໄປສູ່ແນວທາງສີຂຽວໄດ້.

ມັນຍັງໝາຍເຖິງການປົກປັກຮັກສາປ່າໄມ້ ແລະ ລະບົບນິເວດ ທີ່ເປັນເຄື່ອງມືອັນເຂັ້ມແຂງໃນການແກ້ໄຂບັນຫາດິນຟ້າອາກາດ.

ມັນຍັງໝາຍເຖິງການສ້າງຄວາມຄືບໜ້າຢ່າງໄວວາໃນການຫຼຸດຜ່ອນການປ່ອຍອາຍພິດມີເທນ.

ແລະ ຍັງລວມໄປເຖິງການຈັດຕັ້ງປະຕິບັດຄຳໝັ້ນສັນຍາທີ່ໃຫ້ໄວ້ຢູ່ ປາຣີ ແລະ Glasgow.

ຜູ້ນຳມີໜ້າທີ່ນຳພາ.

ແຕ່ພວກເຮົາກໍ່ສາມາດເຮັດໃນສ່ວນຂອງຕົນເອງໄດ້.

ພວກເຮົາເປັນໜີ້ຕໍ່ໄວໜຸ່ມ, ພາກສັງຄົມ ແລະ ຊຸມຊົນພື້ນເມືອງ ທີ່ເປັນຜູ້ສົ່ງສັນຍານເຕືອນ ແລະ ເຮັດໃຫ້ຜູ້ນຳຕ້ອງອອກມາຮັບຜິດຊອບ.

ພວກເຮົາຕ້ອງເສີມຂະຫຍາຍວຽກງານຂອງພວກເຂົາເພີ່ມຕື່ມ ເພື່ອສ້າງການເຄື່ອນໄຫວໃນຂັ້ນຮາກຖານ ທີ່ຈະບໍ່ຖືກລະເລີຍ.

ຖ້າທ່ານອາໄສຢູ່ໃນໂຕເມືອງໃຫຍ່, ເຂດຊົນນະບົດ, ຫຼື ເກາະດອນຂະໜາດນ້ອຍ;

ຖ້າທ່ານລົງທຶນໃນຕະຫຼາດຫຸ້ນ;

ຖ້າທ່ານເປັນກັງວົນກ່ຽວກັບຄວາມຍຸຕິທຳ, ແລະ ອະນາຄົດຂອງລູກຫຼານ;

ຂ້າພະເຈົ້າຂໍວິງວອນມາຍັງທ່ານ:

ຈົ່ງຮຽກຮ້ອງໃຫ້ລິເລີ່ມນຳໃຊ້ພະລັງງານທົດແທນຕັ້ງແຕ່ດຽວນີ້ - ໂດຍໄວ ແລະ ກວ້າງຂວາງ.

ຈົ່ງຮຽກຮ້ອງໃຫ້ຢຸດເຊົານຳໃຊ້ພະລັງງານຖ່ານຫິນ.

ຈົ່ງຮຽກຮ້ອງໃຫ້ຢຸດເຊົາສະໜັບສະໜຸນເຊື້ອໄຟຟອດຊິວ.

ບົດລາຍງານໃນມື້ນີ້ຖືກເຜີຍແຜ່ໃນທ່າມກາງທີ່ໂລກພວມປະເຊີນກັບຄວາມວຸ້ນວາຍ.

ຄວາມບໍ່ສະເໝີພາບເພີ່ມຂຶ້ນໃນລະດັບທີ່ບໍ່ເຄີຍມີມາກ່ອນ. ການຟື້ນຟູຄືນຈາກການແຜ່ລະບາດຂອງ ພະຍາດໂຄວິດ-19 ກໍ່ບໍ່ທັນປະຕິບັດໄດ້ຢ່າງເທົ່າທຽມກັນ.

ອັດຕາເງິນເຟີ້ກຳລັງເພີ່ມສູງຂຶ້ນ, ແລະ ສົງຄາມໃນ ອູແກຣນ ກໍ່ໄດ້ເຮັດໃຫ້ລາຄາອາຫານ ແລະ ພະລັງງານເພີ່ມສູງຂຶ້ນ.

ການເພີ່ມການຜະລິດເຊື້ອໄຟຟອດຊິວຍິ່ງຈະເຮັດໃຫ້ບັນຫາທີ່ກ່າວມານັ້ນຮ້າຍແຮງຂຶ້ນຕື່ມ.

ແຕ່ລະປະເທດເຫຼືອພຽງທາງເລືອກທີ່ຈະບັນລຸໃຫ້ໄດ້ ຫຼື ລະເລີຍເປົ້າໝາຍ 1.5 ອົງສາດັ່ງກ່າວ.

ການປ່ຽນຜ່ານໄປສູ່ພະລັງງານທົດແທນຈະຊ່ວຍແກ້ໄຂສະພາບການດ້ານພະລັງງານໂລກທີ່ພວມເປັນບັນຫາ ແລະ ຈະຊ່ວຍສ້າງຄວາມຫວັງໃຫ້ແກ່ຫຼາຍລ້ານຄົນທີ່ກຳລັງສູ້ຊົນກັບຜົນກະທົບດ້ານສະພາບອາກາດໃນປັດຈຸບັນ.

ຄຳໝັ້ນສັນຍາ ແລະ ແຜນການດ້ານດິນຟ້າອາກາດຈະຕ້ອງຖືກນຳມາຈັດຕັ້ງປະຕິບັດໃຫ້ເກີດຜົນເປັນຈິງ, ເລີ່ມຕັ້ງແຕ່ດຽວນີ້.

ເຖິງເວລາຢຸດທຳລາຍໂລກຂອງພວກເຮົາໄດ້ແລ້ວ, ແລະ ເລີ່ມຕົ້ນລົງທຶນໃສ່ພະລັງງານທົດແທນທີ່ມີຢູ່ອ້ອມຮອບໂຕເຮົາ.