ຮັບປະກັນການມີຊີວິດຂັ້ນເລີ່ມຕົ້ນທີ່ດີຂອງເດັກ: ການໃຫ້ອຸດໜູນແມ່ ແລະ ເດັກໃນ ສປປ ລາວ

ລັດຖະບານແຫ່ງ ສປປ ລາວໄດ້ຈັດຕັ້ງປະຕິບັດ ໂຄງການໃຫ້ອຸດໜູນແມ່ ແລະ ເດັກ - ໂດຍສະເພາະແມ່ນ ການອຸດໜູນເງີນສົດໃຫ້ແກ່ແມ່ຍິງຖືພາ ແລະ ເດັກເກີດໃໝ່ ໂດຍເສື່ອມສານກັບການບໍລິການຝາກທ້ອງ, ກວດຫຼັງເກີດ ແລະ ສະໜັບສະໜູນການຂຶ້ນທະບຽນການເກີດຂອງເດັກ. ມ ການໃຫ້ອຸດໜູນແມ່ ແລະ ເດັກໄດ້ເປີດຕົວຂຶ້ນຢ່າງເປັນທາງການ ໃນ​ເດືອນ​ມິ​ຖຸ​ນາ ປີ 2021, ເຊິ່ງເປັນສ່ວນໜື່ງຂອງໂຄງການຮ່ວມມື ຂອງອົງການເຄືອຂ່າຍ ສະຫະປະຊາຊາດ ທີ່​ມີ​ຊື່​ວ່າ “ສ້າງພື້ນຖານໃຫ້ແກ່ລະບົບປົກປ້ອງສັງຄົມຂັ້ນພື້ນຖານໃນ ສປປ ລາວ”. ມາຮອດປະຈຸບັນ, ມີແມ່ຍິງຖືພາ ແລະ ເດັກຕ່ຳກ່ວາ 6 ເດືອນປະມານ 700 ຄົນໄດ້ຮັບການລົງທະບຽນເຂົ້າລະບົບເພື່ອຮັບອຸດໜູນ ແລະ ຍັງສືບຕໍ່ລົງທະບຽນຜູ້ໄດ້ຮັບສິດ ຢ່າງໜ້ອຍ 700 ຄົນເພີ່ມອີກ. ໂຄງການດັ່ງ​ກ່າວ​ເປັນ​ໂຄງ​ການ​ທົດລອງ ແລະ ຈັດຕັ້ງປະຕິບັດຢູ່ໃນ 3 ເມືອງເປົ້າໝາຍ ເຊັ່ນ ເມືອງສະໜາມໄຊ ແລະ ເມືອງພູວົງ, ແຂວງອັດຕະປື ແລະ ເມືອງນອງ ຂອງແຂວງສະຫວັນນະເຂດ. ບົດຮຽນທີ່ຖອດຖອນໄດ້ຈາກການທົດລອງນີ້ ຈະຖືກໄປນຳໃຊ້ໃນການຂະຫຍາຍການໃຫ້ອຸດໜູນແມ່ຍິງ ແລະ ເດັກໃນເມືອງອື່ນໆຂອງປະເທດໃນໄລຍະຕໍ່ໄປ.

"ຍ້ອນສະພາບການລະບາດຂອງໂຄວິດ - 19, ຈິ່ງເປັນຄັ້ງທຳອິດທີ່ພວກເຮົາໄດ້ເລີ່ມຈັດຕັ້ງປະຕິບັດໂຄງການປົກປ້ອງສັງຄົມແບບຜ່ານທາງໄກ ໂດຍສະເພາະແມ່ນການລົງທະບຽນກຸ່ມເປົ້າໝາຍ ແລະ ການຝຶກອົບຮົມພະນັກງານ. ອັນນີ້ໄດ້ເຮັດໃຫ້ການໃຫ້ອຸດໜູນແມ່ ແລະ ເດັກນີ້ກາຍເປັນນະວັດຕະກຳອັນໃໝ່ຂອງພວກເຮົາ." Beate Dastel, ຮັກສາການ ຫົວໜ້າອົງການ UNICEF ປະຈຳ ສປປ ລາວ

ໂຄງການໄດ້ປັບໃຊ້ວິທິການຈັດຕັ້ງປະຕິບັດຕ່າງໆໄປຕາມສະພາບເສດຖະກິດສັງຄົມຂອງປະເທດ ແລະ ສະພາບການແຜ່ລະບາດຂອງໄຂ້ຫວັດໃຫຍ່ສາຍພັນໃໝ່.

ລະດັບການເຂົ້າເຖິງແຫຼ່ງການເງີນໃນ ສປປ ລາວແມ່ນຍັງຕ່ຳຫຼາຍ ເຊິ່ງເຫັນວ່າປະຊາຊາຊົນໃນເຂດຊົນນະບົົດສ່ວນໜ້ອຍເທົ່ານັ້ນທີ່ມີບັນຊີທະນາຄານ ເພາະລະບົບຕາໜ່າງທະນາຄານຍັງບໍ່ທັນຂະຫຍາຍໄປສູ່ຊົນນະບົດໄດ້ຢ່າງທົ່ວເຖິງ. ການຈ່າຍອຸດໜູນແມ່ ແລະ ເດັກໃນຄັ້ງນີ້ແມ່ນນຳໃຊ້ລະບົບການເງີນແບບດີຈີຕອນ ເຊັ່ນ "U-Money" ທີ່ຈ່າຍຜ່ານເລກໝາຍໂທລະສັບທີ່ລົງທະບຽນຂອງຜູ້ໄດ້ຮັບສິດ. ບໍລິສັດທີ່ຮັບຜິດຊອບຈ່າຍອຸດໜູນນີ້ຈະເດີນທາງໄປຫາຜູ້ໄດ້ຮັບສິດທີ່ບໍ່ມີເລກໝາຍໂທລະສັບໃນຂັ້ນບ້ານເພື່ອຈ່າຍເງີນອຸດໜູນ. ກົນໄກການຈ່າຍເງີນໃນຮູບແບບດີຈີຕອນນີ້ ເປັນທີ່ນ່າສົນໃຈຫຼາຍໃນຍຸກປະຈຸບັນ ແລະ ບົດຮຽນນີ້ຈະຖືກນຳໄປໃຊ້ໃນການຈ່າຍອຸດໜູນສະຫວັດດີການສັງຄົມ ແລະ ປະກັນສັງຄົມອື່ນໆອີກ.

ໂຄງການໃຫ້ອຸດໜູນແມ່ ແລະ ເດັກໄດ້ນຳໃຊ້ຫຼາຍຮູບແບບໃນການສ້າງຕັ້ງລະບົບ ແລະ ການສື່ສານໄປສູ່ຊຸມຊົນເປົ້າໝາຍ. ລະບົບປົກປ້ອງສັງຄົມພາຍໃນປະເທດແມ່ນຍັງບໍ່ທັນເຂັ້ມແຂງເທື່ອ. ຕາມທຳມະດາແລ້ວ, ກ່ອນຈະຈັດຕັ້ງປະຕິບັດການຈ່າຍອຸດໜູນນັ້ນ ຕ້ອງມີລະບົບ ແລະ ໂຄງລ່າງພື້ນຖານດ້ານການປົກປ້ອງສັງຄົມແລ້ວ. ອົງການ ຢູນີເຊັບ ກຳລັງສະໜັບສະໜູນ ກະຊວງແຮງງານ ແລະ ສະຫວັດດີການສັງຄົມ ໃນການຈັດຕັ້ງປະຕິບັດໂຄງການຮ່ວມກັບອຳ​ນາດ​ການ​ປົກ​ຄອງຂັ້ນບ້ານ, ເມືອງ ແລະ ຂະແໜງສາທາລະນະສຸກໃນບັນ​ດາເມືອງທີ່ທົດລອງຈັດ​ຕັ້ງ​ປະ​ຕິ​ບັດ​ໂຄງ​ການ​ນີ້. ຍ້ອນແນວນີ້ ໜື່ງໃນອົງປະກອບຂອງການທົດລອງໃຫ້ອຸດໜູນແມ່ ແລະ ເດັກ ຈິ່ງເປັນອົງປະກອບດ້ານການສື່ສານເພື່ອປ່ຽນແປງພືດຕິກຳ ເພື່ອໃຫ້ປະຊາຊົນປ່ຽນແປງແນວຄວາມຄິດ ແລະ ການກະທຳແບບດັ່ງເດີມ ໂດຍຫັນສູ່ການນຳໃຊ້ລະບົບປົກປ້ອງສັງຄົມໃຫ້ຫຼາຍຂຶ້ນ.

ອັດຕາຄວາມທຸກຍາກໃນ ສປປ ລາວ ແມ່ນຍັງຢູ່ໃນລະດັບສູງຫຼາຍ, ສະນັ້ນ ໂຄງການໃຫ້ອຸດໜູນແມ່ ແລະ ເດັກຈິ່ງນຳໃຊ້ຫຼາກຫຼາຍວິທີການແບບເສື່ອມສານເພື່ອເອົາຊະນະຄວາມທຸກຍາກດັ່ງກ່າວ. ໂຄງການໄດ້ເສື່ອມສານການໃຫ້ອຸດໜູນດ້ານເງີນສົດໃຫ້ແກ່ແມ່ຍິງຖືພາ ແລະ ເດັກເກີດໃໝ່ ກັບການຝາກທ້ອງ, ການກວດຫຼັງເກີດ ແລະ ການຂຶ້ນທະບຽນເດັກເກີດໃໝ່. ການອອກແບບໂຄງການໃນລັກສະນະນີ້ ແມ່ນເພື່ອຮັບປະກັນໃຫ້ເດັກສາມາດເຂົ້າເຖິງແຫຼ່ງໂພຊະນະການ ແລະ ຊຸດບໍລິການປິ່ນປົວສຸຂະພາບພາຍໃນ 1000 ວັນທຳອິດຂອງຊີວິດເດັກ.

ໂຄງການຮ່ວມມືລະຫວ່າງ ລັດຖະບານແຫ່ງ ສປປ ລາວ ແລະ ອົງການເຄືອຂ່າຍ ສະຫະປະຊາຊາດແມ່ນເພື່ອ ເລັ່ງລັດຄວາມຄືບໜ້າສູ່ການບັນລຸເປົ້າໝາຍພັດທະນາແບບຍືນຍົງທີ 1(ລືບລ້າງຄວາມທຸກຍາກ), ເປົ້າໝາຍທີ 2 (ລຶບລ້າງຄວາມອຶດຫິວ) ແລະ ເປົ້າໝາຍທີ 16 (ສັນຕິພາບ, ຄວາມຍຸຕິທຳ ແລະ ການສ້າງສະຖາບັນທີ່ເຂັ້ມແຂງ).

ຂຽນໂດຍ Loveleen De ໃນນາມຕົວແທນຂອງ ແຜນງານຮ່ວມຂອງ ສປຊ ກ່ຽວກັບການປົກປ້ອງສັງຄົມ ໃນ ສປປ ລາວ.